ଭୁବନେଶ୍ୱର: ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟୁଇଟ୍କୁ ନେଇ ମନ୍ତ୍ରୀ ସୁରେଶ ପୂଜାରୀଙ୍କ ଟିପ୍ପଣୀ ପରେ ମୁହାଁମୁହିଁ ହୋଇଛନ୍ତି ବିଜେଡି ଓ ବିଜେପି। ମନ୍ତ୍ରୀଙ୍କ ମନ୍ତବ୍ୟର ଜବାବ ଦେବାକୁ ଯାଇ ବିଜେଡି ଆଜି ସାମ୍ବାଦିକ ସମ୍ମିଳନୀରେ ସୁରେଶ ପୂଜାରୀଙ୍କୁ ଟାର୍ଗେଟ କରିଛି।
ବିଜେଡି ପକ୍ଷରୁ କୁହାଯାଇଛି ଯେ, ଗତକାଲି ନବୀନ ପଟ୍ଟନାୟକ BPSPA ଦୀକ୍ଷାନ୍ତ ସମାରୋହ ଓ ପୁଲିସ ନିଯୁକ୍ତି ପରୀକ୍ଷାକୁ ନେଇ ସରକାରଙ୍କୁ ପ୍ରଶ୍ନ କରିଥିଲେ। BPSPA ଦୀକ୍ଷାନ୍ତ ସମାରୋହରେ ମୁଖ୍ୟମନ୍ତ୍ରୀ ସାଲାମୀ ଦେବା ପ୍ରସଙ୍ଗ ଉଠାଇ ନବୀନ କହିଥିଲେ ଯେ, ଏହି ବ୍ୟବସ୍ଥା ବିଜେଡି ସରକାର ସମୟରେ ଆରମ୍ଭ ହୋଇଥିଲା।
ସେହିପରି ୩୩୬ ଜଣ SI ପରୀକ୍ଷାର୍ଥୀ ଉତ୍ତୀର୍ଣ୍ଣ ହେବାକୁ ସ୍ୱାଗତଯୋଗ୍ୟ ପଦକ୍ଷେପ ବୋଲି କହିବା ସହ ପ୍ରଶ୍ନପତ୍ର ଲିକ୍ ଅଭିଯୋଗରେ OPRBର CPS ପରୀକ୍ଷା ବାତିଲ ହୋଇଥିବା ନେଇ ନବୀନ ପ୍ରଶ୍ନ ଉଠାଇଥିଲେ। ପରୀକ୍ଷା କେବେ ହେବ ଏବଂ ଏହି ଘଟଣାର ତଦନ୍ତ ଚାଲିଥିବା ବେଳେ ସରକାରଙ୍କ ପରବର୍ତ୍ତୀ ପଦକ୍ଷେପ କ’ଣ, ସେନେଇ ସେ ପ୍ରଶ୍ନ କରିଥିବା ବିଜେଡି କହିଛି।
ଏହାର ଜବାବରେ ମନ୍ତ୍ରୀ ସୁରେଶ ପୂଜାରୀ ନବୀନଙ୍କୁ ଟିପ୍ପଣୀ ନଦେବାକୁ କହିଥିବା ନେଇ ବିଜେଡି କ୍ଷୋଭ ପ୍ରକାଶ କରିଛି। ବିଜେଡିର ନେତାମାନେ କହିଛନ୍ତି, ନବୀନ ପଟ୍ଟନାୟକ ସାଧାରଣତଃ ଟିପ୍ପଣୀ ଦେବା ଅପେକ୍ଷା ତଥ୍ୟ ଓ ପ୍ରସଙ୍ଗ ଉଠାଇଥାନ୍ତି। ତେଣୁ ମନ୍ତ୍ରୀ ନିଜେ ତଥ୍ୟ ସହ ଜବାବ ଦେବା ଉଚିତ ବୋଲି ବିଜେଡି କହିଛି।
ବିଜେଡି ଆହୁରି କହିଛି ଯେ, ଜାତୀୟ ରାଜନୀତିରେ ବିଜେପିର ‘୪୦୦ ପାର୍’ ନାରା ୨୪୦ ଆସନରେ ସୀମିତ ହୋଇଥିବାବେଳେ ରାମ ମନ୍ଦିର ଥିବା ଫୈଜାବାଦ ଲୋକସଭା ଆସନରେ ବିଜେପି ପରାଜିତ ହୋଇଥିଲା। ଏହା ସହ ପୁରୀରେ ମଧ୍ୟ ବିଜେପିର ପରାଜୟକୁ ନେଇ ବିଜେଡି ପ୍ରଶ୍ନ ଉଠାଇଛି।
ରତ୍ନଭଣ୍ଡାର ପ୍ରସଙ୍ଗ ଉଠାଇ ବିଜେଡି ନେତାମାନେ କହିଛନ୍ତି, ରତ୍ନଭଣ୍ଡାର ସୁରକ୍ଷିତ ଥିବା ବେଳେ ଏହି ପ୍ରସଙ୍ଗକୁ ନେଇ ଯେଉଁ ରାଜନୈତିକ ଦାବି କରାଯାଉଥିଲା, ତାହା ନେଇ ମଧ୍ୟ ମନ୍ତ୍ରୀ ଆତ୍ମସମୀକ୍ଷା କରିବା ଆବଶ୍ୟକ ବୋଲି ଦଳ କହିଛି।
SI ପରୀକ୍ଷାକୁ ନେଇ ମନ୍ତ୍ରୀଙ୍କୁ ଘେରିଲା ବିଜେଡି
ପୁଲିସ ନିଯୁକ୍ତି ପରୀକ୍ଷା ପରିଚାଳନା ପ୍ରସଙ୍ଗରେ ମଧ୍ୟ ବିଜେଡି ସୁରେଶ ପୂଜାରୀଙ୍କୁ ଟାର୍ଗେଟ କରିଛି। OPRB ଗୃହ ବିଭାଗ ଅଧୀନରେ ଥିବା ଏକ ୱିଙ୍ଗ୍ ଏବଂ ଏହା ପୁଲିସ ନିଯୁକ୍ତି ସମ୍ପର୍କିତ ପରୀକ୍ଷା କରୁଥିବା ବେଳେ ଏହାକୁ UPSC ସହ ତୁଳନା କରାଯିବା ଠିକ୍ ନୁହେଁ ବୋଲି ବିଜେଡି କହିଛି।
ବିଜେଡିର ଅଭିଯୋଗ, ବିଜେପି ସରକାରର ୨୪ ମାସ ମଧ୍ୟରେ ୨୪ରୁ ଅଧିକ ପରୀକ୍ଷାରେ ଅନିୟମିତତା ହୋଇଛି। ଏହାସହ ITI ଓ ପଞ୍ଚସଫ୍ଟ ସମ୍ପର୍କିତ ମାମଲାରେ CBI ତଦନ୍ତ ଓ ରେଡ୍କୁ ନେଇ ମଧ୍ୟ ବିଜେଡି ପ୍ରଶ୍ନ ଉଠାଇଛି। ଏହି ସଂସ୍ଥାଗୁଡ଼ିକ ସହ କେଉଁ ବିଜେପି ନେତାଙ୍କ ସମ୍ପର୍କ ରହିଛି, ତାହା ସ୍ପଷ୍ଟ କରିବାକୁ ଦଳ ଦାବି କରିଛି।
OPRB ମୁଖ୍ୟଙ୍କ ନାଁ ଡିଜିପି ପଦ ପାଇଁ ପଠାଯାଇଥିବା ପ୍ରସଙ୍ଗ ଉଠାଇ ବିଜେଡି ପୁଲିସ ବ୍ୟବସ୍ଥାକୁ ନେଇ ମଧ୍ୟ ପ୍ରଶ୍ନ କରିଛି। ରାଜ୍ୟର ପୁଲିସ ବ୍ୟବସ୍ଥା ଓ ପରୀକ୍ଷା ପରିଚାଳନା ନେଇ ଏଭଳି ପ୍ରଶ୍ନ ଉଠୁଥିବା ବେଳେ ମନ୍ତ୍ରୀ ଏହାର ଉତ୍ତର ଦେବା ଉଚିତ ବୋଲି ବିଜେଡି କହିଛି।
ଶେଷରେ ବିଜେଡି କହିଛି, ବିରୋଧୀ ଦଳ ନେତାଙ୍କୁ କଟୁ ଟିପ୍ପଣୀ କରିବା ପୂର୍ବରୁ ମନ୍ତ୍ରୀ ତଥ୍ୟ ରଖିବା ଆବଶ୍ୟକ। ଶସ୍ତା ଟିପ୍ପଣୀ ନଦେଇ ସରକାରଙ୍କ କାର୍ଯ୍ୟ ଓ ନିଷ୍ପତ୍ତି ଉପରେ ତଥ୍ୟ ସହ ଜବାବ ରଖିବାକୁ ବିଜେଡି ପରାମର୍ଶ ଦେଇଛି।
ତେବେ ବିଜେଡି ପକ୍ଷରୁ ଉଠାଯାଇଥିବା ଅଭିଯୋଗ ଉପରେ ମନ୍ତ୍ରୀ ସୁରେଶ ପୂଜାରୀ କିମ୍ବା ସରକାରଙ୍କ ପକ୍ଷରୁ ତତ୍କାଳ କୌଣସି ପ୍ରତିକ୍ରିୟା ମିଳିନାହିଁ।
