ଭୁବନେଶ୍ୱର: ଖୁବଶୀଘ୍ର ବଜାରକୁ ଆସିବ ଓମ୍ଫେଡ୍ ପାଣି। ଏହାସହ ନୂଆ ନୂଆ ଫ୍ଲେଭରରେ ଆଇସକ୍ରିମ୍ ମଧ୍ୟ ଗ୍ରାହକଙ୍କ ପାଇଁ ଉପଲବ୍ଧ କରାଇବ ଓମ୍ଫେଡ୍। ଏନେଇ ସୂଚନା ଦେଇଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ।
ମନ୍ତ୍ରୀଙ୍କ କହିବା ଅନୁଯାୟୀ, ଓମ୍ଫେଡ୍ ପକ୍ଷରୁ ନୂଆ ପ୍ରଡକ୍ଟ ବଜାରକୁ ଆଣିବା ନେଇ ବୋର୍ଡ ସହ ଆଲୋଚନା ଚାଲିଛି। ବୋର୍ଡର ଅନୁମୋଦନ ମିଳିବା ପରେ ଓମ୍ଫେଡ୍ ପାଣି ଓ ନୂଆ ଫ୍ଲେଭରର ଆଇସକ୍ରିମ୍ ବଜାରକୁ ଆସିବ।
ଅପମିଶ୍ରଣ ନେଇ ଓମ୍ଫେଡ୍ର ଗୁଣବତ୍ତା ଉପରେ ମନ୍ତ୍ରୀଙ୍କ ଜୋର
ରାଜ୍ୟରେ କ୍ଷୀର, ଛେନା ଓ ପନିରରେ ଅପମିଶ୍ରଣ ନେଇ ବିଭିନ୍ନ ଘଟଣା ସାମ୍ନାକୁ ଆସୁଥିବାବେଳେ ଓମ୍ଫେଡ୍ କ୍ଷୀରର ଗୁଣବତ୍ତା ନେଇ ମଧ୍ୟ ମତ ରଖିଛନ୍ତି ମନ୍ତ୍ରୀ। ଓମ୍ଫେଡ୍ କ୍ଷୀରର ଗୁଣବତ୍ତା ଉପରେ ଗୁରୁତ୍ୱ ଦିଆଯାଉଥିବା ସେ କହିଛନ୍ତି।
ମନ୍ତ୍ରୀଙ୍କ ସୂଚନା ଅନୁସାରେ, ଓମ୍ଫେଡ୍ କ୍ଷୀରର ତ୍ରିସ୍ତରୀୟ ଯାଞ୍ଚ କରାଯାଏ। କ୍ଷୀରର ଫ୍ୟାଟ୍ ଚେକିଂ ସହ ଅନ୍ୟାନ୍ୟ ମାନ ଯାଞ୍ଚ କରାଯାଏ। କ୍ଷୀରରେ ଅପମିଶ୍ରଣ ହେଉନାହିଁ ବୋଲି ସେ ଦାବି କରିଛନ୍ତି। ଯଦି କୌଣସି ସ୍ଥାନରେ ଅପମିଶ୍ରଣ ଚିହ୍ନଟ ହୁଏ, ତେବେ ସମ୍ପୃକ୍ତଙ୍କ ବିରୋଧରେ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯାଏ ବୋଲି ସେ କହିଛନ୍ତି।
ଦୁଇ ଟଙ୍କା ବଢ଼ିଲା ଓମ୍ଫେଡ୍ କ୍ଷୀର ଦର
ସେହିପରି ଓମ୍ଫେଡ୍ କ୍ଷୀରର ଦର ଦୁଇ ଟଙ୍କା ବୃଦ୍ଧି ହୋଇଥିବା ମନ୍ତ୍ରୀ କହିଛନ୍ତି। କ୍ଷୀରର ଦର ବୃଦ୍ଧି ଦ୍ୱାରା ରାଜ୍ୟର ଦୁଗ୍ଧ ଚାଷୀମାନେ ଅଧିକ ଲାଭ ପାଇବା ସହ ସ୍ୱାବଲମ୍ବୀ ହୋଇପାରିବେ ବୋଲି ମନ୍ତ୍ରୀ ଆଶା ପ୍ରକାଶ କରିଛନ୍ତି।
ଏବେ ବୋର୍ଡର ଅନୁମୋଦନକୁ ଅପେକ୍ଷା ରହିଛି। ଅନୁମୋଦନ ମିଳିବା ପରେ ଓମ୍ଫେଡ୍ର ନୂଆ ପ୍ରଡକ୍ଟଗୁଡ଼ିକ କେବେ ବଜାରକୁ ଆସିବ, ସେନେଇ ସ୍ପଷ୍ଟ ଚିତ୍ର ମିଳିବ।
