ନୟାଗଡ଼ ଲାଠିପଡ଼ା ପଡ଼ିଆରେ ଆୟୋଜିତ ସୁଭଦ୍ରା କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ସୁଭଦ୍ରା ଯୋଜନାର ପଞ୍ଚମ କିସ୍ତି ପ୍ରଦାନ ସମ୍ପର୍କରେ ବଡ଼ ଘୋଷଣା କରିଛନ୍ତି। ତାଙ୍କ କହିବା ଅନୁସାରେ ୧ କୋଟି ୩ ଲକ୍ଷ ୨୬ ହଜାର ୧୬୨ ଜଣ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ସୁଭଦ୍ରା ଯୋଜନାର ପଞ୍ଚମ କିସ୍ତି ପଠାଯାଇଛି।
ମୁଖ୍ୟମନ୍ତ୍ରୀ କହିଛନ୍ତି ଯେ, ସୁଭଦ୍ରା ଯୋଜନା ରାଜ୍ୟର ସବୁଠୁ ବଡ଼ ମହିଳା କଲ୍ୟାଣ ଯୋଜନା ଭାବେ ପରିଚିତ ହୋଇଛି। ଏହି ଯୋଜନା ପାଇଁ ରାଜ୍ୟ ସରକାର ପ୍ରତିବର୍ଷ ୧୧ ହଜାର କୋଟି ଟଙ୍କାର ବ୍ୟୟବରାଦ କରୁଥିବା ସେ କହିଛନ୍ତି।
IIM ସମ୍ବଲପୁର ସର୍ଭେରେ କଣ ରହିଛି?
ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣରେ IIM ସମ୍ବଲପୁରର ସର୍ଭେ ରିପୋର୍ଟର ତଥ୍ୟ ଉଲ୍ଲେଖ କରି କହିଛନ୍ତି ଯେ ସୁଭଦ୍ରା ଯୋଜନାର ଅର୍ଥକୁ ଅଧିକାଂଶ ମହିଳା ଦୀର୍ଘମିଆଦି ଉପଯୋଗରେ ବ୍ୟବହାର କରୁଛନ୍ତି।
- ୮୦ ପ୍ରତିଶତ ମହିଳା ଦୀର୍ଘମିଆଦି କାର୍ଯ୍ୟରେ ଏହି ଅର୍ଥ ବ୍ୟବହାର କରୁଛନ୍ତି।
- ୨୫.୫ ପ୍ରତିଶତ ମହିଳା ବ୍ୟବସାୟ ଆରମ୍ଭ କିମ୍ବା ବ୍ୟବସାୟରେ ନିବେଶ କରୁଛନ୍ତି।
- ୬୩.୯ ପ୍ରତିଶତ ମହିଳା ନିଜ ପରିବାରର ଆର୍ଥିକ ନିଷ୍ପତ୍ତି ନିଜେ ନେଉଛନ୍ତି।
- ୬୫ ପ୍ରତିଶତ ମହିଳାଙ୍କ ଆର୍ଥିକ ସ୍ୱାଧୀନତା ବୃଦ୍ଧି ପାଇଥିବା ରିପୋର୍ଟରେ ଦର୍ଶାଯାଇଛି।
SBI ରିପୋର୍ଟରେ ମଧ୍ୟ ସକାରାତ୍ମକ ଚିତ୍ର
ଏହା ସହିତ ମୁଖ୍ୟମନ୍ତ୍ରୀ SBI ରିପୋର୍ଟର ଉଦାହରଣ ଦେଇ କହିଛନ୍ତି ଯେ, ସୁଭଦ୍ରା ହିତାଧିକାରୀମାନଙ୍କ ବ୍ୟାଙ୍କ ଆକାଉଣ୍ଟରେ ଜମା ରାଶି ଓ ଦୈନନ୍ଦିନ ଖର୍ଚ୍ଚରେ ବୃଦ୍ଧି ଦେଖାଯାଇଛି। ଏହା ମହିଳାଙ୍କ ଆର୍ଥିକ ସକ୍ରିୟତା ବଢ଼ୁଥିବାର ସଙ୍କେତ ବୋଲି ସେ କହିଛନ୍ତି।
ଦକ୍ଷତା ବିକାଶ ଓ ଲକ୍ଷପତି ଦିଦିରେ ସଫଳତା
ମୁଖ୍ୟମନ୍ତ୍ରୀଙ୍କ ସୂଚନା ଅନୁସାରେ ଏପର୍ଯ୍ୟନ୍ତ ୧୧ ହଜାର ୭୮୯ ଜଣ ହିତାଧିକାରୀ ଦକ୍ଷତା ବିକାଶ ପ୍ରଶିକ୍ଷଣ ଗ୍ରହଣ କରିସାରିଛନ୍ତି। ସେହିପରି ୨୭ ଲକ୍ଷ ଲକ୍ଷପତି ଦିଦି ସୃଷ୍ଟିର ଲକ୍ଷ୍ୟ ୨୦୨୭ ମସିହା ପାଇଁ ଧାର୍ଯ୍ୟ ହୋଇଥିଲେ ମଧ୍ୟ ସରକାର ୨୦୨୬ ମସିହାରେ ହିଁ ଏହି ଲକ୍ଷ୍ୟ ହାସଲ କରିଦେଇଥିବା ଦାବି କରିଛନ୍ତି।
ମହିଳାଙ୍କ ପାଇଁ ବଜେଟ ବ୍ୟୟ ଦୁଇଗୁଣା
ରାଜ୍ୟ ବଜେଟକୁ ନେଇ ମଧ୍ୟ ମୁଖ୍ୟମନ୍ତ୍ରୀ ବଡ଼ ତଥ୍ୟ ରଖିଛନ୍ତି। ତାଙ୍କ କହିବା ଅନୁସାରେ ୧ ଲକ୍ଷ ୨୨ ହଜାର ୭୬୪ କୋଟି ଟଙ୍କାର ରାଜ୍ୟ ବଜେଟର ପ୍ରାୟ ୪୦ ପ୍ରତିଶତ ମହିଳାଙ୍କ କଲ୍ୟାଣ ପାଇଁ ବ୍ୟୟ ହେବ। ପୂର୍ବ ସରକାର ସମୟରେ ଏହି ପରିମାଣ ୬୧ ହଜାର କୋଟି ଟଙ୍କା ଥିବାବେଳେ ବର୍ତ୍ତମାନ ଏହା ପ୍ରାୟ ଦୁଇଗୁଣା ହୋଇଥିବା ସେ କହିଛନ୍ତି।
