ଭୁବନେଶ୍ୱର: ରାଜ୍ୟର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନକୁ ନେଇ ରାଜନୈତିକ ମାହୋଲ ସରଗରମ ହୋଇଛି। ନିର୍ବାଚନ ପୂର୍ବରୁ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି)ର ପ୍ରଦର୍ଶନକୁ ନେଇ ପ୍ରତିକ୍ରିୟା ରଖିଛନ୍ତି ରାଜ୍ୟର ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ମନ୍ତ୍ରୀ।
ମନ୍ତ୍ରୀ କହିଛନ୍ତି ଯେ, ଛାତ୍ରଛାତ୍ରୀମାନେ ହେଉଛନ୍ତି ଦେଶର ଭବିଷ୍ୟତ। ଆଗାମୀ ଦିନର ନେତୃତ୍ୱ ଗଢ଼ିବାର ପ୍ରମୁଖ କେନ୍ଦ୍ର ହେଉଛି କଲେଜ ଓ ବିଶ୍ୱବିଦ୍ୟାଳୟ। ଛାତ୍ର ଜୀବନରୁ ହିଁ ଭବିଷ୍ୟତର ରାଜନୈତିକ ନେତୃତ୍ୱ ସୃଷ୍ଟି ହୋଇଥାଏ। ତେଣୁ ଗଣତାନ୍ତ୍ରିକ ପ୍ରକ୍ରିୟାରେ ଛାତ୍ରଛାତ୍ରୀଙ୍କ ସକ୍ରିୟ ଅଂଶଗ୍ରହଣ ଅତ୍ୟନ୍ତ ଜରୁରୀ।
ପୂର୍ବତନ ବିଜେଡି ସରକାରଙ୍କୁ ସମାଲୋଚନା କରି ମନ୍ତ୍ରୀ କହିଛନ୍ତି, ଦୀର୍ଘ ୨୪ ବର୍ଷର ବିଜେଡି ଶାସନ କାଳରେ ଆଠ ବର୍ଷ ଧରି ଛାତ୍ର ସଂସଦ ନିର୍ବାଚନ ବନ୍ଦ ରହିଥିଲା। ଫଳରେ ଛାତ୍ରଛାତ୍ରୀମାନେ ଗଣତାନ୍ତ୍ରିକ ନେତୃତ୍ୱ ବିକାଶର ସୁଯୋଗରୁ ବଞ୍ଚିତ ହୋଇଥିଲେ। ତେବେ ବର୍ତ୍ତମାନର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଛାତ୍ର ସଂସଦ ନିର୍ବାଚନ କରାଇବା ଦିଗରେ ପଦକ୍ଷେପ ନେଇଥିବାରୁ ମନ୍ତ୍ରୀ ତାଙ୍କୁ ଧନ୍ୟବାଦ ଜଣାଇଛନ୍ତି।
ଅନ୍ୟପଟେ, ନିର୍ବାଚନକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ବ୍ୟାପକ ଉତ୍ସାହ ଦେଖିବାକୁ ମିଳୁଥିବା ମନ୍ତ୍ରୀ କହିଛନ୍ତି। ତାଙ୍କ ଦାବି ଅନୁଯାୟୀ, ବିଭିନ୍ନ ଶିକ୍ଷାନୁଷ୍ଠାନରେ ଏବିଭିପି ସମର୍ଥିତ ପ୍ରାର୍ଥୀମାନେ ଭଲ ପ୍ରଦର୍ଶନ କରୁଛନ୍ତି। ଏପରିକି ଅନେକ ସ୍ଥାନରେ ସଂଗଠନର ପ୍ରାର୍ଥୀମାନେ ନିର୍ଦ୍ୱନ୍ଦ୍ୱରେ ବିଜୟୀ ହୋଇଥିବା ସେ ଦାବି କରିଛନ୍ତି। ଏହା ଛାତ୍ର ସମାଜ ମଧ୍ୟରେ ଏବିଭିପି ପ୍ରତି ବଢ଼ୁଥିବା ସମର୍ଥନର ପ୍ରତିଫଳନ ବୋଲି ସେ ମତବ୍ୟକ୍ତ କରିଛନ୍ତି।
ଏଥିସହ ଶିକ୍ଷିତ ଯୁବପିଢ଼ିଙ୍କ ରାଜନୀତିରେ ପ୍ରବେଶକୁ ଗୁରୁତ୍ୱ ଦେଇ ମନ୍ତ୍ରୀ କହିଛନ୍ତି, ଅଧିକରୁ ଅଧିକ ଶିକ୍ଷିତ ଯୁବକଯୁବତୀ ରାଜନୀତିରେ ସାମିଲ ହେଲେ ରାଜ୍ୟ ଓ ଦେଶର ବିକାଶ ଆହୁରି ତ୍ୱରାନ୍ୱିତ ହେବ। ଯୁବପିଢ଼ିଙ୍କ ସକ୍ରିୟ ଅଂଶଗ୍ରହଣ ଦ୍ୱାରା ରାଜନୀତିରେ ସ୍ୱଚ୍ଛତା ବୃଦ୍ଧି ପାଇବା ସହ ଦୁର୍ନୀତି ହ୍ରାସ ପାଇବ ବୋଲି ସେ ଆଶା ପ୍ରକାଶ କରିଛନ୍ତି।
ତେବେ ଛାତ୍ର ସଂସଦ ନିର୍ବାଚନରେ କେଉଁ ଛାତ୍ର ସଂଗଠନକୁ କେତେ ସମର୍ଥନ ମିଳୁଛି, ତାହା ନିର୍ବାଚନୀ ଫଳାଫଳ ପରେ ଅଧିକ ସ୍ପଷ୍ଟ ହେବ।
