ଓରାଙ୍ଗଓଟାନ ପ୍ରସଙ୍ଗରେ ବିଜେଡି ବିଧାୟକଙ୍କୁ ବିଜେପିର ସାଂଘାତିକ ପ୍ରଶ୍ନ!

ଭୋଗରାଇ ଅଞ୍ଚଳରୁ ଓରାଙ୍ଗଓଟାନ ଉଦ୍ଧାର ଘଟଣାକୁ ନେଇ ସମ୍ପୃକ୍ତି ନେଇ ସନ୍ଦେହ ପ୍ରକାଶ

ଭୁବନେଶ୍ୱର: ଓଡ଼ିଶାରେ ଓରାଙ୍ଗଓଟାନ ଉଦ୍ଧାର ଘଟଣାକୁ ନେଇ ରାଜନୈତିକ ବୟାନବାଜି ତୀବ୍ର ହୋଇଛି। ଏହି ପ୍ରସଙ୍ଗରେ ବିଜେଡି ବିଧାୟକଙ୍କ ବିରୋଧରେ ସାଂଘାତିକ ପ୍ରଶ୍ନ ଉଠାଇଛି ବିଜେପି। ଓରାଙ୍ଗଓଟାନ ସ୍ମଗଲିଙ୍ଗ ଘଟଣାରେ ଭୋଗରାଇ ବିଧାୟକଙ୍କ ସମ୍ପୃକ୍ତି ନେଇ ସନ୍ଦେହ ପ୍ରକାଶ କରିଛନ୍ତି ବିଜେପି ବିଧାୟକ ଇରାଶିଷ ଆଚାର୍ଯ୍ୟ।

ଇରାଶିଷ ଆଚାର୍ଯ୍ୟ ପ୍ରଶ୍ନ କରିଛନ୍ତି, “ଯିଏ ଅଭିଯୋଗ କରୁଛନ୍ତି, ତାଙ୍କ ଅଞ୍ଚଳରେ ଓରାଙ୍ଗଓଟାନ ଉଦ୍ଧାର ହୋଇଛି। ସେଥିରେ ତାଙ୍କର ସମ୍ପୃକ୍ତି ନାହିଁ ତ? ସେଥିପାଇଁ ତାଙ୍କର ଚିନ୍ତା ବଢ଼ି ଯାଇନି ତ?”

ତେବେ ବିଜେପି ବିଧାୟକଙ୍କ ଏହି ମନ୍ତବ୍ୟକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ତେବେ ଏହି ସମ୍ପୃକ୍ତି ନେଇ କୌଣସି ନିଶ୍ଚିତ ପ୍ରମାଣ ସାମ୍ନାକୁ ଆସିଛି କି ନାହିଁ, ସେନେଇ ତଦନ୍ତ ରିପୋର୍ଟ ଆସିବା ପରେ ହିଁ ସ୍ପଷ୍ଟ ହେବ।

“ସରକାର ସମ୍ବେଦନଶୀଳ, ଏସଟିଏଫ କରୁଛି ତଦନ୍ତ”

ଓରାଙ୍ଗଓଟାନ ପ୍ରସଙ୍ଗରେ ସରକାରଙ୍କ ଆଭିମୁଖ୍ୟ ସମ୍ପର୍କରେ ଇରାଶିଷ ଆଚାର୍ଯ୍ୟ କହିଛନ୍ତି ଯେ, “ଓରାଙ୍ଗଓଟାନ ପ୍ରସଙ୍ଗରେ ଆମ ସରକାର ସମ୍ବେଦନଶୀଳ ଅଛନ୍ତି। ଏସଟିଏଫ ତଦନ୍ତ କରୁଛି। ନୋଟିସ ହୋଇଛି।”

ଘଟଣାର ଶୀଘ୍ର ତଦନ୍ତ କରି ପ୍ରକୃତ ତଥ୍ୟ ସାମ୍ନାକୁ ଆଣିବାକୁ ସରକାର ଉଦ୍ୟମ କରୁଥିବା ସେ କହିଛନ୍ତି। ଏଥିସହ ଉଦ୍ଧାର ହୋଇଥିବା ଓରାଙ୍ଗଓଟାନକୁ ସୁରକ୍ଷିତ ରଖିବା ପାଇଁ ନନ୍ଦନକାନନରେ ବ୍ୟବସ୍ଥା କରାଯାଇଥିବା ସେ ସୂଚନା ଦେଇଛନ୍ତି।

“ଘଟଣାକୁ ରାଜନୀତିକରଣ କରିବା ନିନ୍ଦନୀୟ”

ଘଟଣାକୁ ନେଇ ରାଜନୀତି କରାଯାଉଥିବା ଅଭିଯୋଗ କରି ଇରାଶିଷ ଆଚାର୍ଯ୍ୟ କହିଛନ୍ତି ଯେ, ଏଭଳି ସମ୍ବେଦନଶୀଳ ଘଟଣାକୁ ରାଜନୀତିକରଣ କରିବା ଭୁଲ। ଏହା ଦ୍ୱାରା ଲୋକଙ୍କ ମଧ୍ୟରେ ଭୁଲ ଧାରଣା ସୃଷ୍ଟି କରିବାର ଚେଷ୍ଟା ହେଉଛି, ଯାହା ନିନ୍ଦନୀୟ ବୋଲି ସେ କହିଛନ୍ତି।

ଏବେ ଓରାଙ୍ଗଓଟାନ ଉଦ୍ଧାର ଘଟଣାର ତଦନ୍ତ କେଉଁ ଦିଗକୁ ଯାଉଛି ଏବଂ ଏହା ପଛରେ କାହାର ସମ୍ପୃକ୍ତି ରହିଛି କି ନାହିଁ, ତାହା ତଦନ୍ତ ପରେ ହିଁ ସ୍ପଷ୍ଟ ହେବ।