୩୩୬ ଏସଆଇଙ୍କ ଦୀକ୍ଷାନ୍ତ ସମାରୋହ, ‘କମ୍ବାଇନ୍ଡ ପୋଲିସ ସର୍ଭିସ୍ ପରୀକ୍ଷା କେବେ?’ ପ୍ରଶ୍ନ
ଭୁବନେଶ୍ୱର: ଗୋଟିଏ ପଟେ ଓଡ଼ିଶା ପୋଲିସରେ ସବ୍-ଇନ୍ସପେକ୍ଟର୍ (ଏସଆଇ) ଭାବେ ନବନିଯୁକ୍ତ ଅଧିକାରୀମାନେ ପ୍ରଶିକ୍ଷଣ ଶେଷ କରି ଦାୟିତ୍ୱ ନେଉଛନ୍ତି। ଅନ୍ୟପଟେ ପ୍ରଶ୍ନପତ୍ର ଲିକ୍କୁ ନେଇ ବାତିଲ ହୋଇଥିବା ପୋଲିସ ନିଯୁକ୍ତି ପରୀକ୍ଷାକୁ ନେଇ ହଜାର ହଜାର ଆଶାୟୀ ଏବେ ବି ଅନିଶ୍ଚିତତାରେ ରହିଥିବା ଅଭିଯୋଗ ହୋଇଛି। ଏହାକୁ ନେଇ ବିଜେପି ସରକାରକୁ ଟାର୍ଗେଟ କରିଛି ବିଜୁ ଜନତା ଦଳ (ବିଜେଡି)।
ଶୁକ୍ରବାର ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀରେ ୧୩ତମ ବ୍ୟାଚ୍ ଏସଆଇ ଅଧିକାରୀଙ୍କ ଦୀକ୍ଷାନ୍ତ ସମାରୋହ ଅନୁଷ୍ଠିତ ହୋଇଥିଲା। ସମାରୋହରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେଇ ଦୀକ୍ଷାନ୍ତ ପରେଡ୍ରେ ସଲାମୀ ଗ୍ରହଣ କରିଥିଲେ। ଦୁଇ ବର୍ଷର ପ୍ରଶିକ୍ଷଣ ଶେଷ କରିଥିବା ୩୩୬ ଜଣ ଏସଆଇ ଅଧିକାରୀ ଏହି ଅବସରରେ ଓଡ଼ିଶା ପୋଲିସରେ ଯୋଗଦେଇଛନ୍ତି।
ମୁଖ୍ୟମନ୍ତ୍ରୀ ନବନିଯୁକ୍ତ ଅଧିକାରୀମାନଙ୍କୁ ଶୁଭେଚ୍ଛା ଜଣାଇବା ସହ ନ୍ୟାୟିକ ବ୍ୟବସ୍ଥାକୁ ମଜଭୁତ କରିବା ଏବଂ ଲୋକଙ୍କ ସେବା ପାଇଁ ଦୃଢ଼ ସଙ୍କଳ୍ପର ସହ କାର୍ଯ୍ୟ କରିବାକୁ ଆହ୍ୱାନ ଦେଇଥିଲେ।
ତେବେ ଏହି ନିଯୁକ୍ତିକୁ ନେଇ ରାଜନୈତିକ ବୟାନବାଜି ଆରମ୍ଭ ହୋଇଛି। ବିଜେଡି ପକ୍ଷରୁ କୁହାଯାଇଛି ଯେ, ଏହି ୩୩୬ ଜଣ ଏସଆଇଙ୍କ ନିଯୁକ୍ତି ପ୍ରକ୍ରିୟା ପୂର୍ବ ସରକାର ସମୟରେ ଆରମ୍ଭ ହୋଇଥିଲା। ତେଣୁ ଏହାର ଶ୍ରେୟ ନେବା ପୂର୍ବରୁ ବର୍ତ୍ତମାନର ସରକାର ପ୍ରଶ୍ନପତ୍ର ଲିକ୍ ଯୋଗୁଁ ବାତିଲ ହୋଇଥିବା କମ୍ବାଇନ୍ଡ ପୋଲିସ ସର୍ଭିସ୍ ପରୀକ୍ଷାର ଭବିଷ୍ୟତ ନେଇ ସ୍ପଷ୍ଟତା ଦେବା ଉଚିତ ବୋଲି ଦଳ ଦାବି କରିଛି।
ବିଜେଡି ଅଭିଯୋଗ କରିଛି ଯେ, ପରୀକ୍ଷା ବାତିଲ ହେବା ପରେ ହଜାର ହଜାର ଯୁବକ-ଯୁବତୀଙ୍କ ଏକ ବର୍ଷରୁ ଅଧିକ ସମୟ ପ୍ରଭାବିତ ହୋଇଛି। ପୁନଃ ପରୀକ୍ଷା କେବେ ହେବ ଏବଂ ପ୍ରଶ୍ନପତ୍ର ବିକ୍ରି ଓ ଲିକ୍ ଘଟଣାରେ ସମ୍ପୃକ୍ତ ଦୋଷୀଙ୍କ ବିରୋଧରେ କେବେ କଠୋର କାର୍ଯ୍ୟାନୁଷ୍ଠାନ ହେବ, ସେନେଇ ସରକାର ସ୍ପଷ୍ଟ ଜବାବ ଦେବା ଦରକାର ବୋଲି ଦଳ କହିଛି।
ବିଜେଡି ଆହୁରି କହିଛି ଯେ, ନିଯୁକ୍ତି ପ୍ରକ୍ରିୟାରେ ବିଳମ୍ବ ଯୋଗୁଁ ଆଶାୟୀ ଯୁବକ-ଯୁବତୀଙ୍କ ଆତ୍ମବିଶ୍ୱାସ ପ୍ରଭାବିତ ହେଉଛି। ସରକାରୀ ନିଯୁକ୍ତି ବ୍ୟବସ୍ଥାର ସ୍ୱଚ୍ଛତା ଓ ନିରପେକ୍ଷତା ନେଇ ମଧ୍ୟ ପ୍ରଶ୍ନ ଉଠୁଥିବା ଦଳ ଅଭିଯୋଗ କରିଛି।
କମ୍ବାଇନ୍ଡ ପୋଲିସ ସର୍ଭିସ୍ ପରୀକ୍ଷାକୁ ତୁରନ୍ତ ପୁନଃ ଆୟୋଜନ କରିବା ନେଇ ବିଜ୍ଞପ୍ତି ପ୍ରକାଶ ସହ ଯୁବ ଆଶାୟୀଙ୍କ ଭବିଷ୍ୟତକୁ ନେଇ ସରକାର ସ୍ପଷ୍ଟ ରୋଡମ୍ୟାପ୍ ଦେବାକୁ ବିଜେଡି ଦାବି କରିଛି।
ଏହାସହ ବିଜେଡି ବର୍ତ୍ତମାନର ସରକାରଙ୍କ ଉପରେ ‘ମିଛ ଶ୍ରେୟ’ ନେବାର ଅଭିଯୋଗ ଆଣିଛି। ଆଗାମୀ ଦିନରେ ଯୁବକ-ଯୁବତୀଙ୍କ ନିଯୁକ୍ତି ସମ୍ପର୍କିତ ପ୍ରସଙ୍ଗ ରାଜ୍ୟ ରାଜନୀତିରେ ଆହୁରି ତୀବ୍ର ହୋଇପାରେ ବୋଲି ଚର୍ଚ୍ଚା ହେଉଛି।
