ଡିଜିଟାଲ୍ ଯୁଗରେ ସହରାଞ୍ଚଳ ଯାତାୟାତ ଓ ଜୀବନଧାରଣ ମାନ ଉପରେ ହେବ ଆଲୋଚନା
ଭୁବନେଶ୍ୱର: ଆସନ୍ତାକାଲିଠାରୁ ରାଜଧାନୀ ଭୁବନେଶ୍ୱରରେ ଆରମ୍ଭ ହେବ ଉନବିଂଶତମ ‘ଅର୍ବାନ୍ ମୋବିଲିଟି ଇଣ୍ଡିଆ’ ସମ୍ମିଳନୀ ଓ ପ୍ରଦର୍ଶନୀ। କେନ୍ଦ୍ର ଆବାସ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ ପକ୍ଷରୁ ଆୟୋଜିତ ଏହି ଦୁଇଦିନିଆ କାର୍ଯ୍ୟକ୍ରମ ଅକ୍ଟୋବର ୨୪ ଓ ୨୫ ତାରିଖରେ ଅନୁଷ୍ଠିତ ହେବ। ଏହା ସହିତ ଭୁବନେଶ୍ୱରରେ ଦ୍ୱିତୀୟ ‘ଜାତୀୟ ସହରାଞ୍ଚଳ ସମ୍ମିଳନୀ’ ମଧ୍ୟ ଆୟୋଜନ କରାଯିବ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ କେନ୍ଦ୍ର ଆବାସ ଓ ସହରାଞ୍ଚଳ ବ୍ୟାପାର ରାଷ୍ଟ୍ରମନ୍ତ୍ରୀ ତୋଖନ ସାହୁ ଏହି ସମ୍ମିଳନୀର ଉଦ୍ଘାଟନ କରିବେ। ଏହି ଦୁଇଟି ଜାତୀୟସ୍ତରୀୟ କାର୍ଯ୍ୟକ୍ରମରେ ଦେଶର ସହରାଞ୍ଚଳ ବିକାଶ, ଯାତାୟାତ ବ୍ୟବସ୍ଥା ଏବଂ ଭବିଷ୍ୟତର ସହର ନିର୍ମାଣ ସମ୍ପର୍କରେ ବ୍ୟାପକ ଆଲୋଚନା ହେବ।
‘ଅର୍ବାନ୍ ମୋବିଲିଟି ଇଣ୍ଡିଆ ୨୦୨୬’ର ମୁଖ୍ୟ ବିଷୟବସ୍ତୁ ରହିଛି ‘ଡିଜିଟାଲ୍ ଯୁଗର ସହରାଞ୍ଚଳ ସୁଗମତା ଓ ଜୀବନଧାରଣ ମାନ’। ଏହି ପ୍ରସଙ୍ଗରେ ସହରାଞ୍ଚଳ ଯାତାୟାତକୁ ଅଧିକ ସୁଗମ, ସୁବିଧାଜନକ ଓ ଜନଅନୁକୂଳ କରିବା ସହ ଡିଜିଟାଲ୍ ପ୍ରଯୁକ୍ତିର ଉପଯୋଗ ଉପରେ ଗୁରୁତ୍ୱ ଦିଆଯିବ।
ସେହିପରି ଦ୍ୱିତୀୟ ‘ଜାତୀୟ ସହରାଞ୍ଚଳ ସମ୍ମିଳନୀ’ର ବିଷୟବସ୍ତୁ ରହିଛି ‘ସହରାଞ୍ଚଳ ବିକାଶ: ସହରାଞ୍ଚଳ ବ୍ୟବସ୍ଥା, ସମାଧାନ ଏବଂ ସେବା ପ୍ରଦାନ ପ୍ରକ୍ରିୟା ଉପରେ ପୁନର୍ବିଚାର’। ଏହି ସମ୍ମିଳନୀରେ ସହର ପରିଚାଳନା, ନାଗରିକ ସେବାର ଉନ୍ନତି ଏବଂ ସହରାଞ୍ଚଳ ବିକାଶକୁ ଅଧିକ ଦକ୍ଷ ଓ ସୁଦୃଢ଼ କରିବା ନେଇ ବିଚାରବିମର୍ଶ କରାଯିବ।
ଭାରତୀୟ ସହରଗୁଡ଼ିକର ଭବିଷ୍ୟତକୁ ନେଇ ଆଲୋଚନା କରିବା ଲକ୍ଷ୍ୟରେ ଏହି ଦୁଇଟି କାର୍ଯ୍ୟକ୍ରମରେ ନୀତି ନିର୍ଦ୍ଧାରକ, ସହରାଞ୍ଚଳ ବିଶେଷଜ୍ଞ ଏବଂ ବିଭିନ୍ନ କ୍ଷେତ୍ରର ଅଂଶୀଦାରମାନେ ଯୋଗଦେବେ। ସହରାଞ୍ଚଳ ଯୋଜନା, ଆଧୁନିକ ଯାତାୟାତ ବ୍ୟବସ୍ଥା ଓ ନାଗରିକଙ୍କ ଜୀବନଧାରଣ ମାନରେ ଉନ୍ନତି ଆଣିବା ଦିଗରେ ଏହି ସମ୍ମିଳନୀ ଗୁରୁତ୍ୱପୂର୍ଣ୍ଣ ମଞ୍ଚ ସାବ୍ୟସ୍ତ ହେବ ବୋଲି ଆଶା କରାଯାଉଛି।
