ଭୁବନେଶ୍ୱର: ରାଜ୍ୟରେ ଅଣ୍ଡା ଦର ବୃଦ୍ଧିକୁ ନେଇ ଗ୍ରାହକଙ୍କ ପାଇଁ ଆସିଛି ଆଶ୍ୱସ୍ତିର ଖବର। ଆଗାମୀ ଦିନରେ ଅଣ୍ଡା ଦର ଧୀରେ ଧୀରେ କମିବ ବୋଲି କହିଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ। ବନ୍ୟା ଯୋଗୁଁ କିଛି କୁକୁଡ଼ା ଫାର୍ମ ପ୍ରଭାବିତ ଓ ନଷ୍ଟ ହୋଇଥିବାରୁ ଏହାର ପ୍ରଭାବ ଅଣ୍ଡା ଦର ଉପରେ ପଡ଼ିଥିବା ସେ କହିଛନ୍ତି।
ମନ୍ତ୍ରୀଙ୍କ କହିବା ଅନୁଯାୟୀ, ଓଡ଼ିଶାରେ ଅଣ୍ଡାର ଚାହିଦା ଅଧିକ ରହିଛି। ଏଥିସହ ରାଜ୍ୟରୁ ବାହାରକୁ ମଧ୍ୟ ଅଣ୍ଡା ଯୋଗାଣ ହେଉଛି। ଚାହିଦା ଓ ଯୋଗାଣର ଏହି ସ୍ଥିତି ଯୋଗୁଁ ଦର ବୃଦ୍ଧି ପାଇଥିବା ସେ କହିଛନ୍ତି।
ବର୍ତ୍ତମାନ ରାଜ୍ୟରେ ଦୈନିକ ପ୍ରାୟ ୧ କୋଟି ୨୫ ଲକ୍ଷ ଅଣ୍ଡା ଉତ୍ପାଦନ ହେଉଛି। ଏହି ଉତ୍ପାଦନକୁ ବଢ଼ାଇ ଦୈନିକ ୨ କୋଟି ଅଣ୍ଡା ଉତ୍ପାଦନ କରିବା ସରକାରଙ୍କ ଲକ୍ଷ୍ୟ ରହିଛି। କୁକୁଡ଼ା ଚାଷୀଙ୍କୁ ସରକାରଙ୍କ ପକ୍ଷରୁ ବିଭିନ୍ନ ପ୍ରୋତ୍ସାହନ ଓ ସହାୟତା ଦିଆଯାଉଥିବାରୁ ଆଗାମୀ ଦିନରେ ରାଜ୍ୟର ଅଣ୍ଡା ଉତ୍ପାଦନ ଆହୁରି ବଢ଼ିବ ବୋଲି ମନ୍ତ୍ରୀ ଆଶା ପ୍ରକାଶ କରିଛନ୍ତି।
ବନ୍ୟା ଯୋଗୁଁ କିଛି କୁକୁଡ଼ା ଫାର୍ମ ପ୍ରଭାବିତ ହେବା ସହ କେତେକ ଫାର୍ମ ନଷ୍ଟ ହୋଇଛି। ଫଳରେ ଉତ୍ପାଦନ ଉପରେ ପ୍ରଭାବ ପଡ଼ିବା ସହ ଅଣ୍ଡା ଦର ବୃଦ୍ଧି ପାଇଥିବା ମନ୍ତ୍ରୀ କହିଛନ୍ତି। ତେବେ ସ୍ଥିତି ଧୀରେ ଧୀରେ ସ୍ୱାଭାବିକ ହେବା ସହ ଅଣ୍ଡା ଦର ମଧ୍ୟ କମିବ ବୋଲି ସେ କହିଛନ୍ତି।
ଚିକେନ୍ ଦର ନିୟନ୍ତ୍ରଣ ବିଭାଗ ଅଧୀନରେ ନାହିଁ
ଅନ୍ୟପଟେ, ଚିକେନ୍ ଦର ବୃଦ୍ଧିକୁ ନେଇ ମଧ୍ୟ ମନ୍ତ୍ରୀ ସ୍ପଷ୍ଟୀକରଣ ଦେଇଛନ୍ତି। ଚିକେନ୍ ଦର ନିୟନ୍ତ୍ରଣ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗର ଅଧୀନରେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଉତ୍ପାଦନ ଓ ବଜାର ସ୍ଥିତି ଅନୁସାରେ ଚିକେନ୍ ଦର ନିର୍ଦ୍ଧାରିତ ହୋଇଥାଏ। ବନ୍ୟାରେ କୁକୁଡ଼ା ଫାର୍ମଗୁଡ଼ିକ ପ୍ରଭାବିତ ହୋଇଥିବାରୁ ବର୍ତ୍ତମାନ ଚିକେନ୍ ଦର ବଢ଼ିଥିଲେ ମଧ୍ୟ ସ୍ଥିତି ସ୍ୱାଭାବିକ ହେଲେ ଦର ଧୀରେ ଧୀରେ କମିବ ବୋଲି ମନ୍ତ୍ରୀ କହିଛନ୍ତି।
ଗ୍ରାମାଞ୍ଚଳରେ କୁକୁଡ଼ା ଚାଷକୁ ପ୍ରୋତ୍ସାହନ
ଗ୍ରାମାଞ୍ଚଳରେ କୁକୁଡ଼ା ଚାଷକୁ ବଡ଼ ବଡ଼ କମ୍ପାନୀ ସହଯୋଗ କରୁଥିବା ମନ୍ତ୍ରୀ କହିଛନ୍ତି। ଚାଷୀଙ୍କୁ ଚିଆଁଠାରୁ ଦାନା ପର୍ଯ୍ୟନ୍ତ ବିଭିନ୍ନ ସାମଗ୍ରୀ ଯୋଗାଇ ଚାଷରେ ସହାୟତା କରାଯାଉଛି। ତେବେ ଏହି କ୍ଷେତ୍ରରେ ମନମୁଖୀ କାରବାର ନଜରକୁ ଆସିଲେ ତାହାର ସମାଧାନ କରାଯିବ ବୋଲି ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି।
