କଟକ, ୨୯ ସେପ୍ଟେମ୍ବର: କ୍ରିକେଟ୍ ମ୍ୟାଚ୍ରେ ଚୌକା, ଛକା ଓ ୱିକେଟ୍ର ରୋମାଞ୍ଚ ଦେଖିବାକୁ ଦର୍ଶକ ଅପେକ୍ଷା କରିଥାନ୍ତି। କିନ୍ତୁ ବର୍ଷା ଯେତେବେଳେ ଖେଳରେ ବାଧକ ସାଜେ, ସେତେବେଳେ ଆରମ୍ଭ ହୁଏ ପଡ଼ିଆ ପଛର ଅସଲ ସଂଘର୍ଷ। ଖେଳାଳିମାନେ ପାଭିଲିୟନରେ ଅପେକ୍ଷା କରୁଥିବା ବେଳେ ବାରବାଟୀ ଷ୍ଟାଡିୟମର ଗ୍ରାଉଣ୍ଡ ଷ୍ଟାଫ୍ମାନେ ଖେଳକୁ ପୁଣିଥରେ ଆରମ୍ଭ କରାଇବା ପାଇଁ ଦିନରାତି ପରିଶ୍ରମ କରୁଛନ୍ତି।
ବର୍ଷା ପ୍ରଭାବିତ ଭାରତ ମସଲା ଓଡ଼ିଶା ଟି-୨୦ ଲିଗ୍–ସିଏମ୍ ଟ୍ରଫି ସମୟରେ ବାରବାଟୀର ଗ୍ରାଉଣ୍ଡ ଷ୍ଟାଫ୍ଙ୍କ ଏହି ନିରବ ସେବା ଓ ଅକ୍ଳାନ୍ତ ପରିଶ୍ରମ ସାମ୍ନାକୁ ଆସିଛି। ବର୍ଷା ଛାଡ଼ିବା ମାତ୍ରେ ସୀମିତ ସମୟ ମଧ୍ୟରେ ପିଚ୍ ଓ ଆଉଟଫିଲ୍ଡକୁ ଖେଳ ଉପଯୋଗୀ କରିବା ସେମାନଙ୍କ ପାଇଁ ବଡ଼ ଚ୍ୟାଲେଞ୍ଜ ପାଲଟିଛି।
୨୦ ବର୍ଷର ଅଭିଜ୍ଞତା, ତଥାପି ବର୍ଷା ବଡ଼ ଚ୍ୟାଲେଞ୍ଜ
ପ୍ରାୟ ୨୦ ବର୍ଷ ଧରି ଗ୍ରାଉଣ୍ଡ ପରିଚାଳନା କ୍ଷେତ୍ରରେ କାର୍ଯ୍ୟ କରୁଥିବା ହୃଷୀକେଶ ସିଂହ ଓରଫ କେଶବଙ୍କ କହିବା ଅନୁସାରେ, ବର୍ଷା ଋତୁରେ ଖେଳପଡ଼ିଆକୁ ପ୍ରସ୍ତୁତ ରଖିବା ସହଜ କାମ ନୁହେଁ। ତେବେ ଅଭିଜ୍ଞତା, ଉପଯୁକ୍ତ କୌଶଳ ଓ ସମସ୍ତଙ୍କ ମିଳିତ ପ୍ରୟାସରେ ଏହି ଚ୍ୟାଲେଞ୍ଜର ମୁକାବିଲା କରାଯାଉଛି।
ସେ କହିଛନ୍ତି, ବର୍ଷା ଛାଡ଼ିବା ପରେ ପ୍ରଥମେ ପିଚ୍କୁ ପ୍ରସ୍ତୁତ କରାଯାଏ। ଏହାପରେ ଆଉଟଫିଲ୍ଡରେ ଜମିଥିବା ପାଣି ଓ ଆର୍ଦ୍ରତା ଦୂର କରି ଖେଳ ପାଇଁ ଉପଯୁକ୍ତ ପରିସ୍ଥିତି ସୃଷ୍ଟି କରିବାକୁ ପଡ଼େ।
୧୨ ଗ୍ରାଉଣ୍ଡ ଷ୍ଟାଫ୍ଙ୍କ ସହ ୫୦ରୁ ୬୦ ଜଣଙ୍କ ପରିଶ୍ରମ
ହୃଷୀକେଶଙ୍କ ସୂଚନା ଅନୁଯାୟୀ, ଗ୍ରାଉଣ୍ଡ ପ୍ରସ୍ତୁତି କାର୍ଯ୍ୟରେ ୧୨ ଜଣ ନିୟମିତ ଗ୍ରାଉଣ୍ଡ ଷ୍ଟାଫ୍ଙ୍କ ସମେତ ପ୍ରାୟ ୫୦ରୁ ୬୦ ଜଣ ସହଯୋଗ କରିଛନ୍ତି। କେବଳ ପିଚ୍କୁ ଖେଳ ଉପଯୋଗୀ କରିବା ପାଇଁ ଅତି କମ୍ରେ ଦେଢ଼ରୁ ଦୁଇ ଘଣ୍ଟା ସମୟ ଲାଗିଥାଏ।
ବିଶେଷକରି ବର୍ଷା ଯୋଗୁଁ ମ୍ୟାଚ୍ ବିଳମ୍ବ ହୋଇଥିଲେ ଅଳ୍ପ ସମୟ ମଧ୍ୟରେ ସମସ୍ତ କାର୍ଯ୍ୟ ଶେଷ କରିବାକୁ ପଡ଼େ। ଏଭଳି ପରିସ୍ଥିତିରେ ଟିମ୍ୱର୍କ ହିଁ ସବୁଠାରୁ ବଡ଼ ଶକ୍ତି ବୋଲି ସେ କହିଛନ୍ତି।
ମ୍ୟାଚ୍ ଆରମ୍ଭ କରାଇବା ହିଁ ମୁଖ୍ୟ ଲକ୍ଷ୍ୟ
ବର୍ଷା ଯୋଗୁଁ ଖେଳ ବାଧାପ୍ରାପ୍ତ ହେଲେ ମଧ୍ୟ ମ୍ୟାଚ୍କୁ ପୁନର୍ବାର ଆରମ୍ଭ କରାଇବା ପାଇଁ ଗ୍ରାଉଣ୍ଡ ଷ୍ଟାଫ୍ ସମସ୍ତ ପ୍ରୟାସ ଜାରି ରଖୁଛନ୍ତି। ଏଥିପାଇଁ ଆୟୋଜକ ଓ ସେକ୍ରେଟାରୀଙ୍କ ପକ୍ଷରୁ ଆବଶ୍ୟକ ସହଯୋଗ ମିଳୁଥିବା ହୃଷୀକେଶ ପ୍ରକାଶ କରିଛନ୍ତି।
କେବଳ ପଡ଼ିଆକୁ ଶୁଖାଇବା ନୁହେଁ, ଖେଳାଳିଙ୍କ ସୁରକ୍ଷା ଦୃଷ୍ଟିରୁ ପିଚ୍ ଓ ଆଉଟଫିଲ୍ଡ ଖେଳ ପାଇଁ ଉପଯୁକ୍ତ ରହିଛି କି ନାହିଁ, ତାହା ମଧ୍ୟ ଗୁରୁତ୍ୱପୂର୍ଣ୍ଣ।
ପରଦା ପଛର ଅସଲ ନାୟକ
କ୍ରିକେଟ୍ ମ୍ୟାଚ୍ରେ ଖେଳାଳିଙ୍କ ପ୍ରଦର୍ଶନକୁ ନେଇ ଚର୍ଚ୍ଚା ହୁଏ। କିନ୍ତୁ ସେହି ମ୍ୟାଚ୍କୁ ସଫଳ କରିବା ପଛରେ ଗ୍ରାଉଣ୍ଡ ଷ୍ଟାଫ୍ଙ୍କ ଅବଦାନ ଅନେକ ସମୟରେ ଆଲୋଚନାରୁ ଦୂରେଇ ରହିଯାଏ।
ବାରବାଟୀ ଷ୍ଟାଡିୟମରେ ବର୍ଷା ସହ ସଂଘର୍ଷ କରି ଖେଳପଡ଼ିଆକୁ ପ୍ରସ୍ତୁତ କରୁଥିବା ଏହି କର୍ମଚାରୀମାନେ ପ୍ରମାଣ କରୁଛନ୍ତି ଯେ କ୍ରିକେଟ୍ କେବଳ ୨୨ ଗଜର ଲଢ଼େଇ ନୁହେଁ, ଏହା ପଛରେ ରହିଛି ଅନେକ ଅଦୃଶ୍ୟ ହାତର ଅକ୍ଳାନ୍ତ ପରିଶ୍ରମ।
