ବିଧାନସଭାରେ ସରକାରଙ୍କ ତଥ୍ୟ; ଦୁର୍ନୀତି ଓ ସରକାରୀ ଅର୍ଥ ଅପବ୍ୟବହାର ମାମଲାରେ ୧୫ ପଞ୍ଚାୟତିରାଜ ପ୍ରତିନିଧି ନିଲମ୍ବିତ
ଭୁବନେଶ୍ୱର: ଗତ ଦୁଇ ବର୍ଷ ମଧ୍ୟରେ ରାଜ୍ୟରେ ଅନାସ୍ଥା ପ୍ରସ୍ତାବ ଯୋଗୁଁ ୬୧ ଜଣ ସରପଞ୍ଚ ଓ ୯ ଜଣ ପଞ୍ଚାୟତ ସମିତି ଅଧ୍ୟକ୍ଷ ପଦ ହରାଇଛନ୍ତି। ପଞ୍ଚାୟତିରାଜ ସଂସ୍ଥାର ନିର୍ବାଚିତ ପ୍ରତିନିଧିଙ୍କ ବିରୋଧରେ ଅନାସ୍ଥା ପ୍ରସ୍ତାବ, ଦୁର୍ନୀତି ଓ ସରକାରୀ ଅର୍ଥର ଅପବ୍ୟବହାର ସମ୍ପର୍କିତ ପ୍ରଶ୍ନର ଉତ୍ତରରେ ସରକାର ବିଧାନସଭାରେ ଏହି ତଥ୍ୟ ରଖିଛନ୍ତି।
ବିଧାୟକ ପ୍ରତାପ ଦେବଙ୍କ ପ୍ରଶ୍ନର ଲିଖିତ ଉତ୍ତରରେ ସମ୍ପୃକ୍ତ ମନ୍ତ୍ରୀ ଏହି ତଥ୍ୟ ଦେଇଛନ୍ତି। ଅନୁଗୁଳ, ବାଲେଶ୍ୱର, ବରଗଡ଼, ବଲାଙ୍ଗିର, ଢେଙ୍କାନାଳ, ଗଞ୍ଜାମ, ଯାଜପୁର, କଳାହାଣ୍ଡି, କନ୍ଧମାଳ ଓ କେନ୍ଦ୍ରାପଡ଼ା ସମେତ ବିଭିନ୍ନ ଜିଲ୍ଲାରେ ଅନାସ୍ଥା ପ୍ରସ୍ତାବ ସମ୍ପର୍କିତ ମାମଲା ରହିଥିବା ତଥ୍ୟରୁ ଜଣାପଡ଼ିଛି।
ଅନ୍ୟପକ୍ଷରେ, ଦୁର୍ନୀତି ଓ ସରକାରୀ ଅର୍ଥର ଅପବ୍ୟବହାର ସମ୍ପର୍କିତ ମାମଲାରେ ୧୫ ଜଣ ପଞ୍ଚାୟତିରାଜ ପ୍ରତିନିଧିଙ୍କୁ ନିଲମ୍ବିତ କରାଯାଇଥିବା ସରକାର ଜଣାଇଛନ୍ତି। ସେହିପରି କେତେକ ମାମଲାରେ ପ୍ରତିନିଧିଙ୍କ ବିରୋଧରେ ପ୍ରସିକ୍ୟୁସନ୍ ବା ଆଇନଗତ ଅଭିଯୋଜନ ପ୍ରକ୍ରିୟା ଆରମ୍ଭ ହୋଇଛି।
ନିଲମ୍ବନ ତଥ୍ୟ ଅନୁସାରେ ବରଗଡ଼ ଜିଲ୍ଲାରେ ସର୍ବାଧିକ ୩ ଜଣ ସରପଞ୍ଚ ନିଲମ୍ବିତ ହୋଇଛନ୍ତି। ବଲାଙ୍ଗିର ଓ ନୂଆପଡ଼ାରେ ୨ ଜଣ ଲେଖାଏଁ ନିଲମ୍ବିତ ହୋଇଛନ୍ତି। ଏହାଛଡ଼ା ଅନୁଗୁଳ, ଭଦ୍ରକ, ଢେଙ୍କାନାଳ, ଗଜପତି, କଳାହାଣ୍ଡି, କୋରାପୁଟ, ମୟୂରଭଞ୍ଜ ଓ ସୁବର୍ଣ୍ଣପୁର ଜିଲ୍ଲାରେ ମଧ୍ୟ ପଞ୍ଚାୟତିରାଜ ପ୍ରତିନିଧିଙ୍କ ବିରୋଧରେ ନିଲମ୍ବନ କାର୍ଯ୍ୟାନୁଷ୍ଠାନ ହୋଇଛି।
ସେହିପରି ଅନୁଗୁଳ ଓ ବାଲେଶ୍ୱର ସମେତ କେତେକ ଜିଲ୍ଲାରେ ସରକାରୀ ଅର୍ଥର ଦୁର୍ନୀତି ଓ ଅପବ୍ୟବହାର ଅଭିଯୋଗରେ PRI ପ୍ରତିନିଧିଙ୍କ ବିରୋଧରେ ପ୍ରସିକ୍ୟୁସନ୍ ଆରମ୍ଭ ହୋଇଥିବା ମଧ୍ୟ ସରକାରଙ୍କ ତଥ୍ୟରେ ଉଲ୍ଲେଖ ରହିଛି।
ପଞ୍ଚାୟତ ସ୍ତରରେ ଅନାସ୍ଥା ପ୍ରସ୍ତାବ ସହ ଦୁର୍ନୀତି ଓ ସରକାରୀ ଅର୍ଥ ଅପବ୍ୟବହାର ମାମଲାରେ ନିଆଯାଇଥିବା କାର୍ଯ୍ୟାନୁଷ୍ଠାନର ଏହି ତଥ୍ୟ ଏବେ ବିଧାନସଭାରେ ସାମ୍ନାକୁ ଆସିଛି।
