ନରସିଂହପୁର: କଥାବାର୍ତ୍ତା କଲେ ୧୦ ହଜାର ଟଙ୍କା ଜରିମାନା ଧମକ, ଗାଁ ନଳକୂଅରୁ ପାଣି ଆଣିବା ଓ ଦୋକାନରୁ ସଉଦା କିଣିବା ଉପରେ କଟକଣା ଲଗାଯାଇଥିବା ଅଭିଯୋଗ।
ନରସିଂହପୁର, କଟକ: କଟକ ଜିଲ୍ଲା ନରସିଂହପୁର ବ୍ଲକ ଅନ୍ତର୍ଗତ ଅଲରା ଗ୍ରାମରେ କଙ୍ଗାରୁ କୋର୍ଟ ଚଳାଇ ଜଣେ ବ୍ୟକ୍ତି ଓ ତାଙ୍କ ପରିବାରକୁ ସାମାଜିକ ବାସନ୍ଦ କରାଯାଇଥିବା ଭଳି ଗୁରୁତର ଅଭିଯୋଗ ସାମ୍ନାକୁ ଆସିଛି। ଅସୁସ୍ଥତା କାରଣରୁ ଗ୍ରାମ କମିଟି ବୈଠକରେ ଉପସ୍ଥିତ ହୋଇପାରିନଥିବା ନରେନ୍ଦ୍ର ନାୟକଙ୍କ ବିରୋଧରେ ଏକତରଫା ନିଷ୍ପତ୍ତି ନିଆଯାଇ ତାଙ୍କୁ ନିଆଁପାଣି ବାସନ୍ଦ କରାଯାଇଥିବା ସେ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, କିଛିଦିନ ତଳେ ଏକ ଜମିକୁ କେନ୍ଦ୍ର କରି ଗ୍ରାମରେ ବିବାଦ ଉପୁଜିଥିଲା। ଏହି ବିବାଦର ସମାଧାନ ପାଇଁ ଗ୍ରାମ ସଭାପତି ଦିଲୀପ ବିଶ୍ୱାଳ ଏକ ବୈଠକ ଡକାଇଥିଲେ। ତେବେ ନରେନ୍ଦ୍ର ନାୟକଙ୍କ ସ୍ୱାସ୍ଥ୍ୟାବସ୍ଥା ଖରାପ ଥିବାରୁ ସେ ଉକ୍ତ ବୈଠକରେ ଯୋଗଦେଇ ପାରିନଥିଲେ। ଏହାର ସୁଯୋଗ ନେଇ ତାଙ୍କ ପକ୍ଷ ନଶୁଣି ଗ୍ରାମ କମିଟି ଏକତରଫା ନିଷ୍ପତ୍ତି ନେଇଥିବା ନରେନ୍ଦ୍ର ଅଭିଯୋଗ କରିଛନ୍ତି।
ନରେନ୍ଦ୍ରଙ୍କ ଅଭିଯୋଗ ଅନୁସାରେ, ଗ୍ରାମ ସଭାପତି ଦିଲୀପ ବିଶ୍ୱାଳ ତାଙ୍କ ସହ କୌଣସି ଗ୍ରାମବାସୀ କଥାବାର୍ତ୍ତା କଲେ ୧୦ ହଜାର ଟଙ୍କା ଜରିମାନା ଦେବାକୁ ପଡ଼ିବ ବୋଲି ନିଷ୍ପତ୍ତି ଶୁଣାଇଛନ୍ତି। ଏପରିକି ନରେନ୍ଦ୍ରଙ୍କୁ ଅନ୍ୟ କାହାରି ଘରକୁ ଯିବା, ଗ୍ରାମର ସାର୍ବଜନୀନ ନଳକୂଅରୁ ପାଣି ଆଣିବା ଏବଂ ଗ୍ରାମ ଦୋକାନରୁ ସଉଦା କିଣିବା ଉପରେ ମଧ୍ୟ କଟକଣା ଲଗାଯାଇଥିବା ସେ କହିଛନ୍ତି।
ଏଭଳି ନିଷ୍ପତ୍ତି ଫଳରେ ନରେନ୍ଦ୍ର ଓ ତାଙ୍କ ପରିବାର ମାନସିକ ଚାପରେ ରହିବା ସହ ସେମାନଙ୍କ ସୁରକ୍ଷାକୁ ନେଇ ଆଶଙ୍କା ପ୍ରକାଶ ପାଇଛି।
ଅନ୍ୟପକ୍ଷରେ, ଗ୍ରାମ ସଭାପତି ଦିଲୀପ ବିଶ୍ୱାଳଙ୍କ ବିରୋଧରେ ପୂର୍ବରୁ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ନେଇ ମଧ୍ୟ ନରେନ୍ଦ୍ର ଅଭିଯୋଗ କରିଛନ୍ତି। ତେବେ ଏହି ଅଭିଯୋଗର ସ୍ୱାଧୀନ ଯାଞ୍ଚ ହୋଇପାରିନାହିଁ।
ଏହି ଘଟଣାକୁ ନେଇ ଗତ ୭ ତାରିଖରେ ଥାନାରେ ଏତଲା ଦିଆଯାଇଥିବା ନରେନ୍ଦ୍ର କହିଛନ୍ତି। ଏତଲା ପରେ ପୋଲିସ ଓ ପ୍ରଶାସନ କି ପଦକ୍ଷେପ ଗ୍ରହଣ କରୁଛନ୍ତି, ତାହା ଏବେ ଦେଖିବାକୁ ବାକି ରହିଛି।
ବର୍ତ୍ତମାନ ନରସିଂହପୁରରେ ଚିକିତ୍ସାଧୀନ ଥିବା ନରେନ୍ଦ୍ର ନାୟକ ନିଜ ପରିବାରର ସୁରକ୍ଷାକୁ ନେଇ ଗଭୀର ଚିନ୍ତା ପ୍ରକାଶ କରିଛନ୍ତି। ତାଙ୍କ କିମ୍ବା ତାଙ୍କ ପରିବାର ସହ କୌଣସି ଅଘଟଣ ଘଟିଲେ ସେଥିପାଇଁ ପୋଲିସ ଓ ଗ୍ରାମ କମିଟି ଦାୟୀ ରହିବେ ବୋଲି ସେ ଚେତାବନୀ ଦେଇଛନ୍ତି।
ଏବେ ପ୍ରଶ୍ନ ଉଠୁଛି, ଗଣତାନ୍ତ୍ରିକ ବ୍ୟବସ୍ଥାରେ ଗ୍ରାମ କମିଟି କାହାକୁ ସାମାଜିକ ବାସନ୍ଦ କରିବାର ଅଧିକାର ରଖିଛି କି? ଜଣେ ଅସୁସ୍ଥ ବ୍ୟକ୍ତିଙ୍କୁ ମୌଳିକ ସୁବିଧାରୁ ବଞ୍ଚିତ କରାଯାଇଥିବା ଅଭିଯୋଗ ଉପରେ ପ୍ରଶାସନ କେବେ ଓ କି ପଦକ୍ଷେପ ନେବ?
ତେବେ ଏହି ସମସ୍ତ ଅଭିଯୋଗ ସମ୍ପର୍କରେ ଗ୍ରାମ ସଭାପତି ଦିଲୀପ ବିଶ୍ୱାଳ ଓ ସ୍ଥାନୀୟ ପୋଲିସଙ୍କ ପ୍ରତିକ୍ରିୟା ମିଳିପାରିନାହିଁ। ସେମାନଙ୍କ ପକ୍ଷ ମିଳିବା ପରେ ଘଟଣା ସମ୍ପର୍କରେ ଅଧିକ ସ୍ପଷ୍ଟତା ଆସିପାରିବ।
